അടിച്ചമര്‍ത്തപ്പെട്ടവരുടെയും ന്യുനപക്ഷങ്ങളുടെയും സാമൂഹിക സാഹോദര്യം ഭാവി രാഷ്ട്രീയത്തെ നിര്‍ണയിക്കും - ടി. ആരിഫലി

Dec 28 - 2017

കൊല്ലം: സംഘ് പരിവാറിന്റെ വംശീയ രാഷ്ട്രീയത്താല്‍ അടിച്ചമര്‍ത്തപ്പെട്ടവരുടെയും ന്യുന പക്ഷങ്ങളുടെയും സാമൂഹിക സാഹോദര്യം ഭാവി രാഷ്ട്രീയത്തെ നിര്‍ണയിക്കുമെന്നു ജമാഅത്തെ ഇസ്ലാമി അഖിലേന്ത്യ ഉപാധ്യക്ഷന്‍ ടി.ആരിഫലി. കൊല്ലം പീരങ്കിമൈതാനിയില്‍ എസ്.ഐ.ഒ ദക്ഷിണ കേരള സമ്മേളനത്തില്‍ മുഖ്യപ്രഭാഷണം നടത്തി സംസാരിക്കുകയായിരുന്നു അദ്ദേഹം. സത്യത്തെ കൊഞ്ഞനംകുത്തി ലോകത്ത് തഴച്ചുവളരുന്ന സാമ്രാജ്യത്വ ശക്തികള്‍ക്കും ഫാഷിസ്റ്റുകള്‍ക്കുമുള്ള ഏറ്റവും മികച്ച മറുമരുന്ന് സാമൂഹിക സാഹോദര്യമാണ്. അമേരിക്കയില്‍ ട്രംപ് അധികാരമേറ്റ ശേഷം നടക്കുന്ന നടപടികളെല്ലാം സത്യത്തോട് തരിമ്പും പ്രതിബദ്ധതയില്ലാത്തതാണെന്ന് ലോകം അംഗീകരിച്ചതാണ്. അവസാനമായി ജറൂസലേമിനെ ഇസ്രയേല്‍ തലസ്ഥാനമായി അംഗീകരിച്ചത് ചരിത്രത്തെയും അന്തരാഷ്ട്ര നിയമങ്ങളെയും കാറ്റില്‍പറത്തിയാണ്. തങ്ങളുടെ സാമന്ത രാഷ്ട്രങ്ങളുടെ പോലും എതിര്‍പ്പിനിടയിലാണ് യു.എസ് സയണിസ്റ്റുകളുടെ അധിനിവേശ മോഹങ്ങള്‍ക്ക് പച്ചക്കൊടി കാണിച്ചത്. ഇന്ത്യയില്‍ മോദി സര്‍ക്കാര്‍ അധികാരം നേടാനും നിലനിര്‍ത്താനും വേണ്ടി വസ്തുതകളെ വളച്ചൊടിച്ച് വ്യാജം പ്രചരിപ്പിക്കുകയാണെന്ന് പ്രതിപക്ഷം ഒന്നടങ്കം ആക്ഷേപമുന്നയിക്കുന്നു. ഗുജറാത്ത് തെരഞ്ഞെടുപ്പ് പ്രചാരണത്തില്‍ മുന്‍ പ്രധാനമന്ത്രി മന്‍മോഹന്‍ സിംഗിനെതിരെ മോദി തന്നെ രാജ്യദ്രോഹം ആരോപിച്ചത് അല്‍ഭുതത്തോടെയാണ് രാജ്യം വീക്ഷിച്ചത്. ഇത്തരത്തില്‍ സത്യത്തിന് തെല്ലും വിലനല്‍കാത്ത അധികാരശക്തികളാണ് ലോകം നിയന്ത്രിക്കുന്നത്. ഇതിനെ പരാജയപ്പെടുത്താന്‍ സത്യത്തോട് പ്രതിബദ്ധതയുള്ള ജനവിഭാഗങ്ങളുടെ സാഹോദര്യത്തിലൂടെ മാത്രമേ സാധ്യമാകൂഅദ്ദേഹം കൂട്ടിച്ചേര്‍ത്തു. ഇന്ത്യയില്‍ അടിച്ചമര്‍ത്തപ്പെടുന്ന ന്യൂനപക്ഷങ്ങളും ദലിതുകളും മറ്റും സാമൂഹിക സാഹോദര്യം എന്നത് രാഷ്ട്രീയമായി ഉന്നയിച്ചാല്‍ അധികാരശക്തിയാകുമെന്നതിന്റെ ഉദാഹരണമാണ് ജിഗ്‌നേഷ് മേവാനിയുടെ വിജയമെന്നും അദ്ദേഹം അഭിപ്രായപ്പെട്ടു.
സമൂഹത്തില്‍ വര്‍ധിച്ചു വരുന്ന വംശീയവും വര്‍ഗീയവുമായ ചേരിതിരിവുകള്‍ക്കെതിരെ കേരളത്തിലെ വിദ്യാര്‍ഥി സമൂഹം രംഗത്ത് വരണമെന്ന് സമ്മേളനം ഉദ്ഘാടനം ചെയ്ത ജമാഅത്തെ ഇസ്ലാമി കേരള അമീര്‍ എം.ഐ അബ്ദുല്‍ അസീസ് ആഹ്വാനം ചെയ്തു.  മുതലാളിത്തത്തിന്റെ സാംസ്‌കാരിക വൈകൃതങ്ങളും വെറുപ്പിന്റെ രാഷ്ട്രീയവും അസഹിഷ്ണുതയും കാമ്പസില്‍ കരുത്താര്‍ജിക്കുമ്പോള്‍ വിപ്ലവ പ്രസ്ഥാനങ്ങള്‍ പോലും അവയുടെ പിടിയിലമരുകയാണ്.  ധാര്‍മികമൂല്യങ്ങളിലൂന്നിയ മുന്നേറ്റത്തിനു മാത്രമേ വിദ്യാര്‍ഥികള്‍ക്കും സമൂഹത്തിനും ദിശ നിര്‍ണയിക്കാന്‍ സാധിക്കൂ എന്നും എം ഐ അബ്ദുല്‍ അസീസ് പറഞ്ഞു. എസ്.ഐ.ഒ അഖിലേന്ത്യ പ്രസിഡന്റ് നഹാസ് മാള സമ്മേളനം പ്രമേയം വിശദീകരിച്ചു.  എന്‍.കെ പ്രേമചന്ദ്രന്‍ എം.പി, ഓള്‍ ഇന്ത്യ മുസ്ലിം പേഴ്‌സണല്‍ ലോ ബോര്‍ഡ് അംഗം അബ്ദുല്‍ ശുക്കൂര്‍ അല്‍ ഖാസിമി, വെല്‍ഫെയര്‍ പാര്‍ട്ടി ഓഫ് ഇന്ത്യ സെക്രട്ടറി കെ. അംബുജാക്ഷന്‍, ജമാഅത്തെ ഇസ്ലാമി വനിതാ വിഭാഗം പ്രസിഡന്റ് എ റഹ്മത്തുന്നിസ, സോളിഡാരിറ്റി സംസ്ഥാന പ്രസിഡന്റ് പി.എം സ്വാലിഹ്, ജി.ഐ.ഒ ജനറല്‍ സെക്രട്ടറി ഫസ്‌ന മിയാന്‍ എന്നിവര്‍ ആശംസകളര്‍പ്പിച്ച് സംസാരിച്ചു. എസ്.ഐ.ഒ സംസ്ഥാന പ്രസിഡന്റ് സുഹൈബ് സി.ടി  അധ്യക്ഷ വഹിച്ചു.
സമ്മേളനത്തോടനുബന്ധിച്ച് നടന്ന പ്രകടനത്തില്‍ പതിനായിര കണക്കിന് വിദ്യാര്‍ഥി യുവജനങ്ങള്‍ പങ്കെടുത്തു. കെ.എസ്.ആര്‍.ടി.സി ജംഗ്ഷനില്‍ നിന്നാരംഭിച്ച പ്രകടനത്തില്‍ നജീബ് അഹമദ്, രോഹിത് വെമുല, റിയാസ് മൗലവി, കൊടിഞ്ഞി ഫൈസല്‍, തുടങ്ങി നീതിക്ക് നിഷേധത്തിനെതിരെയും അവകാശ പോരാട്ടങ്ങള്‍ക്ക് ഐക്യദാര്‍ഢ്യമുയര്‍ത്തിയും വിവിധ മുദ്രാവാക്യമുയര്‍ന്നു. സമ്മേളനത്തില്‍ ജമാഅത്തെ ഇസ്ലാമി അസി. അമീര്‍ പി മുജീബു റഹ്മാന്‍ സമാപനവും എസ്.ഐ.ഒ സംസ്ഥാന ജനറല്‍ സെക്രട്ടറി തൗഫീഖ് മമ്പാട് സ്വാഗതവും സമ്മേളനം ജനറല്‍ കണ്‍വീനര്‍ ആദില്‍ എ നന്ദിയും പറഞ്ഞു.

 

leave a comment

ഇവിടെ കൊടുക്കുന്ന അഭിപ്രായങ്ങള്‍ ഇസ്‌ലാം ഓണ്‍ലൈവിന്റേതാവണമെന്നില്ല. അശ്ലീലവും അസഭ്യവും നിയമവിരുദ്ധവും വ്യക്തിപരവും അപകീര്‍ത്തികരവുമായ പരാമര്‍ശങ്ങള്‍ ഒഴിവാക്കുക.

comments powered by Disqus

news-ad

Recent News